Heb 8 | MYW | STEP | Silawun agulivan ma̱wan: Tanuwagan lun avakaein datoveks Yeisuw nisin Yowbad nakabkaleiwag wanaka̱tay walba̱lab; iwwotet Yowbad nabunatum mounid waseg. Gamag nag iwlules; Yowbad niwlul.

Hebrews 8

Kweivaw kaleiwag

1 Silawun agulivan ma̱wan: Tanuwagan lun avakaein datoveks Yeisuw nisin Yowbad nakabkaleiwag wanaka̱tay walba̱lab; iwwotet Yowbad nabunatum mounid waseg. Gamag nag iwlules; Yowbad niwlul.

3 Tanuwgwes lun babaw siwotet isiwa̱youbs o iluns waseg Yowbad. Towen-vak, kadiloka kweitan youd bisek Yowbad.

4 Kukin bises ven watinow, gamag nag bisekes nawotet mamagina tanuwagan lun; peinan tanuwgwes lun nisesus, igawa ivvaluts Moses nakaleiwag waseg.

5 Tasiyas sibunatum mamagina Yowbad nabunatum walba̱lab, peinan itakayasis. Kweiboug Moses sivinan biwlul kid Yowbad nabunatum, Yowbad mo idibek, ilana,

“Kadiloka kuvakaes youd babaw ma̱wan magin ankakin towen nakatimlakeim wa̱koy.”
6 Tage Kelis nakaleiwag bo ilisow Moses nakaleiwag. O nawotet-vak, ilisow tasiyas siwotet. Peinan sinap towen Yowbad nilivnek, singaya imug.

7 Kukin nag kweitan abkalouw bises waseg kaleiwag kweiboug, nag beivag sivinan kwayuwein.

8 Tage bo ikakin-wan asisinap bo ika̱bwag, ilana:

“MiGuyaw yey agulivan ma̱wan:
Igaw tut wanakougwaw mo basek kweivaw kaleiwag wasigeis min-Yisleil sisiy min-Yud.
9 Nag ma̱wan kaleiwag towen nasekes tibsiyas, misumkwey natokes, namgwayes, mo ilisawes Yidipt.
Tage bo ipiyaves gunakaleiwag towen,
mapuna akamgwayes.”
Yowbad anilivan ma̱wan.

10 E, ilana,

“Tut towen beikous mo basekes min-Yisleil sikaleiwag kweivaw.
Gunakaleiwag basein waninous o balel wakates mo bamlavag siYowbad, o tasiyas gungamag.
11 Nag bikamtilakes sisiyas o budisiyas bilansa, ‘Kadiloka kukwakins Yowbad,’ nag.
Peinan asibabaw bikakinsa yey Yowbad.
Tasiyas toul sisiyas guyawaw bikakinsa yey.
12 Asisinap kalbaleb waseg bo binok nuwag, banumlev, mo beikous.”
13 Liva̱nen kaleiwag kweivaw bo isek, mapuna ipiyev kweiboug kaleiwag. Kaleiwag kweiboug inawotet bo ikous. Kakita bikanig.